Aningaasaliinermut piumasaqaatit nalinginnaasut

Aningaasaliinermut piumasaqaatit suliffeqarfinnut pineqartunut naleqqussarneqartarput, piginnittuunermullu isumaqatigiissut suleqatigiilluni suliarineqassalluni suliffeqarfimmit namminermit imaluunniit Greenland Venturemit.

Piginnittuunermut isumaqatigiissut tassaavoq isumaqatigiissut suliffeqarfiup piginnittuinit isumaqatigiissutigineqartoq, tassani piginnittuunermut atuuffiit suunersut nassuiarneqassapput, qanorlu ulluinnarni taakku ingerlanneqassanersut.

Piginnittuunermut isumaqatigiissut atsiorneqaruni atuutilissaaq, taannalu suliffeqarfimmi piginnittunut tamanut atuutissaaq. Siusinnerusukkut piginnittuunermut isumaqatigiissutaasimasut, tapertaasut ilanngullugit, isumaqatigiissummit atsiukkamit kingullermit Greenland Venturemit piginneqataaffigineqalersumit taarserneqassallutik.  

Piginnittuunermut isumaqatigiissutip piumasaqaatit ilusilissavai

Piginnittuunermut isumaqatigiissummi piumasaqaatit suliffeqarfimmi piginnittut tamarmik malitassaat piginnaatitaaffigisassaallu nassuiarneqassapput.

Piumasaqaatit nassuiarneqassapput qulequtakkaarlugit immikkoortukkaarlugillu inississorneqassallutik. Ataani allassimasut qulequttat nalinginnaasut nassuiaatillu allassimapput.

Piginnittuunermut isumaqatigiissutip imarisaa

  1. Kikkut piginnittuunermut isumaqatigiissummi ilaappat
    Uani kikkut piginnittuunermut isumaqatigiissummi ilaanersut paasissutissiissutigineqassaaq.
  1. Piginnittuunermut isumaqatigiissutip siunertaa qanorlu ittuunera
    Piginnittut immikkut qanoq annertutigisumik suliffeqarfiup nalinganik piginneqataaneri paasissutissiissutigineqassapput.
  1. Piginneqataassutit agguataarneri
    Piginnittut immikkut qanoq annertutigisumik suliffeqarfiup nalinganik piginneqataaneri paasissutissiissutigineqassapput.
  1. Ataatsimeersuarnerit
    Uani ataatsimeersuarnerni piginneqataasup taaseqataasarnissaminut pisussaaffeqarnera malittarisassanillu piginnittuunermut isumaqatigiissummi allaqqasunik malinnittussaatitaanera nassuiarneqassaaq.

    Tamanna isumaqarpoq piginnittup taasinermigut takutissagaa piginnittuunermi isumaqatigiissummi allassimasut ataqqillugillu akueralugit

  1. Siulersuisut
    Piginneqataasut ataasiakkaarlutik suliffeqarfimmi ileqqoreqqusat malillugit siulersuisunik toqqaasinnaanermut katiterisinnaanermullu pisinnaatitaanerat uani nassuiarneqassaaq.
  1. Qullersaqarfeqarneq atorfinitsitsinerlu
    Uani pisortamik imaluunniit atorfinnik aalajangersimasunik immikkut atorfinitstsinermi isumaqatigiissutit aalajangersimasut eqqaaneqarsinnaapput.
  1. Siunnersuinerit aalajangiinerillu
    Ulluinnarni aalajangigassanut tunngasunut sinaakkutit nassuiarneqassapput, taamaalilluni piginnittunut tamanut ersarinnerussammat qanoq aalajangiiffigisassat aalajangerneqartassanersut qaqagukkut qanorinnikkullu taakku pisassanersut.
  1. Ikinnerussuteqartunut illersuineq
    Uani annikinnerusumik suliffeqarfimmik piginneqataasut aalajangigassanut isumaqataanatik pisinnaatitaaffeqarsinnaanerat nassuiarneqassaaq.
  1. Aningaasaliinerit ataasiakkaat
    Piginnittut suliffeqarfimmut allamut aningaasaliisinnaanerannut sinaakkutissat uani nassuiarneqassapput.
  1. Greenland Venturemut isumaqatigiissut
    Greenland Venturep allallu piginneqataasut imminnut isumaqatigiissusiaat erseqqissarneqassapput, niuernermi malittarisassat nalinginnaasut atuuttut atussallugit piginneqataasup piginneqataanini pillugu immikkut iluaqutissartanik pinnginnissaa qulakkeerniarlugu.  
  1. Agguagarsiassat pillugu politikki
    Suliffeqarfiup aningaasaqarnikkut anguniagai nassuiarneqassapput.
  1. Piginneqatigiissummik tunniussineq 
    Piginneqataasup qaqugukkut piginneqataassutsini allamut tuniniarsinnaaneraa, qanoq akia naatsorsorneqassanersoq qanorlu tunisineq ingerlassanersoq tassani piginneqataareersut piginneqataalersussallu eqqarsaatigalugit sinaakkuserneqassaaq. Tassani aamma piginneqataasoq akileraanermik unitsitsissagaluarpat periusissat ilanngunneqassapput.
  1. Atorfimmit soraartoqarnerani
    Pisortaq suliffeqarfimmik piginneqataasoq soraarniuteqassagaluarpat suut piginnaatitaaffigissanerai kiisalu piginneqataasut piginneqataaffimminnik suut piginnaatitaaffigineraat nassuiarneqassaaq.
  1. Eqquutsitsinnginnermi
    Piginneqataasup piginneqataanermut isumaqatigiissut eqquutsissanngikkaluarpagu susoqassanersoq, taassumalu kingunerisinnaasai, tassungalu ilanngullugu piginnaatitaaffinnik annaasaqarsinnaaneq nassuiarneqassapput.
  1. Qularnaveeqqusiisinnaaneq
    Piginnittut ataasiakkaarlutik taarsigassarsianut piginneqataassutiminnik qularnaveeqqusiussisinnaanerat taakkulu sumut atorneqassanersut, piginneqataasunillu ilalerneqassagaluarunik qanoq iliortoqassanersoq sinaakkuserneqassaaq nassuiarneqarlunilu.
  1. Unammilleqatigiinnermut immikkut piumasaqaatit
    Suliffeqarfimmik allamik unammilertigisamik niueqateqarsinnaanermut tunngasut, taakkua ataanni piginnittut ataasiakkaat iliuuserisinnaasaat iliuuserisinnaanngisaallu nassuiarneqassapput.
  1. Paasissutisseeqatigiinneq
    Piginnittut qanoq imminnut paasissutisseeqatigiittarnissaat kiisalu piginneqatitik aningaasaqarnermut aalajangigassanut tunngasunik qanoq akulerutsittassaneraat nassuiarneqassaaq.
  1. Oqaatigeqqunngisanik immikkut piumasaqaatit isertuussinissamillu pisussaaffik
    Piginnittut tamarmik nipangiussisimasussaatitaanerat, isertuussisinnaanissaat oqaatigeqqunngisanillu suliffeqarfik pillugu pisussaaffiat, tassungalu ilanngullugu piginnittup piginneqataanerup nalaani kingornalu qanoq pissusilersortoqassanersoq nassuiarneqassaaq.
  1. Tunniussineq
    Qanoq piginnittunngortoq tigusissanersoq suullu piginnaatitaaffiit piginnittunngortup pissarsiarissanerai.
  1. Allannguutit atorunnaarsitsinerillu 
    Piginnittuunermut isumaqatigiissutip allanngortinnera qanoq ingerlanneqassanersoq nassuiarneqassaaq.
  1. Isumaqatigiissitsiniarneq
    Qanoq suliffeqarfiup iluani isumaqatigiinnginnerit eqqartuussivilersuuttariaqartut pineqartassanersut nassuiarneqassaaq.
  1. Aningaasartuutit
    Kia piginnittuunermut isumaqatigiissutip suliarinera qanorlu annertutigisumik akilissaneraa nassuiarneqassaaq.
  1. Isumaqatigiissutinik pissarsisut
    Kikkut isumaqatigiissutip assilineri pisimanerai allanneqassapput.
  1. Ilanngussat
    Ilanngussat attuumassutillit eqqaaneqassapput.
  1. Piginnittut atsiorneri
    Piginnittut tamarmik atsiorneri: Ateq kinguliarlu, ulloq illoqarfillu, atsiorneq.

Greenland Venture attavigiuk