Greenland Venture suliffeqarfinnut ineriartorusuttunut alliartorusuttunullu, aningaasaliinermik sapiissusilimmik, piginneqataalernikkut atukkiinikkullu aningaasaliisarpoq.
Greenland Venturemit aningaasaliiffigitinneq suliffeqarfiup ineriartornerata aallartinnissaanut aningaasaliinerup ilivitsup ilagaa. Greenland Venturemit aningaasaliiffigitinneq suliffeqarfiup allanit aningaasalerneqarsinnaanissaanut periarfissanik amerlanerusunik ammaagajuttarpoq, soorlu aningaaserivinninngaanniit aningaasalerneqarsinnaaneq.
Aallarniummik oqaloqatigiinneq
Suliffeqarfivit aningaasaliiffigitinnissaanut qinnuteqannginninni aallarniutaasumik Greenland Venturemi Investment Managerimik oqaloqatiginnigit. Investment Managerimik aallarniummik oqaloqatiginninninni aningaasaliinerit qanoq ittut illit suliffeqarfinnut piukkunnarnerunersut ersarinnerulissaaq.
Aningaasaleeriaatsit
Atorneq
Greenland Venturemit atorneq sapiissusilimmik utaqqisinnaassusilimmillu aningaasaliineruvoq illit suliffeqarfiullu pisariaqartitasi naapertorlugit suliffeqarfiup aningaasaqarneranut tulluussagaallunilu pilersaarusiugaasoq. Taamaalilluni suliffeqarfiup aningaasat atukkat akilernissai suliffeqarfiullu ineriartuinnarnissaa alliartuinnarnissaalu illugiimmik ingerlasinnaanissaat qulakkeerneqassaaq.
Malugiuk:
Greenland Venturemit aningaasanik atoruit Greenland Venturip suliffeqarfimmik piginneqataalernissaa piumasaqaataanngilaq.
Piginneqatigiilerneq
Piffissami killilikkamik Greenland Venturemit piginneqataalerneq sapiissusillimmik eqaatsumillu aningaasaliineruvoq. Aningaasaliinerup suliffeqarfiup aningaasaqarnikkut patajaannerusumik inissisimalernissaa siunertarisinnaavaa, suliffeqarfiutivit ineriartornissaa alliartornissaalu piviusunngortissinnaaniassagakku. Piginneqateqalernikkut sulinikkut piginnaasat pissarsiarinissaat kiisalu Greenland Venturemit siulersuisuni issiatitaqarnikkut siulersuinikkut attaveqaatit annertusarnissaat periarfissaalertissinnaavaa.
Aningaasaleeriaatsit akuleriissut
Aningaasaliinissaq aamma allanit aningaasaliiffigineqarsinnaanissaq eqqarsaatigalugu Greenland Venture suliffeqarfimmut tulluuttumik aningaasaliinissamik ilusilersuissaaq, tassanilu suliffeqarfiup ineriartornissaa alliartornissaalu siunertarineqassallutik.
Greenland Venturip aningaasalersuisarnerinik aalajangersimasunik ilusilersoriikkanik toqqariaannarnik soqanngilaq, tamanna peqquteqarpoq suliffeqarfiit pisariaqartitaat assigiinneq ajormata, illillu suliffeqarfiutinnut tunngatillugu suut anguniagarineritit apeqqutaassammat.
Taamaattumik aningaasalersuinissamut tunngatillugu pingaaruteqarpoq Greenland Venturip suliffeqarfiit allat suliffeqarfinnut aningaasalersuinikkut attuumassuteqartut suleqatigilluarnissaat, ilinnut suliffeqarfinnullu pitsaanerpaaq anguniarlugu.
Illit qanimut suleqatigeqqissaarlutit Greenland Venturemit suliffeqarfiutinnut aningaasalersuineq qanoq ittuussanersoq tulluussarneqassaaq.
